سايين یاشاربئي قیزیل باش ، بيرينجي سورغو اولاراق سيزدن كوميته نين نئجه و نه اوچون يارانماسيني سوروشماق ايسته ييرم، داها دوغروسو نه گرك لر ((ضرورت لر)) وارايدي بو كوميته نين يارانماسينا؟

هر شئي دن اؤنجه بوتون آذربايجان ميلتيني و حورمتلي اخوجولاریمیزی سالاملاييرام. كوميته نين نه اوچون و هانسي آماجلار اساسيندا يارانماسي اونون منشوروندا مكمل شكيلده قيد اولونوبدور و من اونلاري بوردا بير-بير سايماق ايسته ميرم، آنجاق بونو دئمك لازيم دير كي بو كميته آذربايجان ميلتينين غيرتلي و شرفلي اوغول و قيزلاري ساريندان باتي آذربايجان بؤلگه سينده باسقينچي ((تجاوزكار)) و تروريست كورد قروپلاري ايله مقابله و مبارزه ائتمك آماجي ايله يارانيب دير.

بوگون آذربايجانين باتي بؤلگه سينده ياشايان سوي داشلاريميز كورد تروریست لرین يوروتدويو و گؤتوردويو سياستلرين و اونلارين گله جه يه دوزنلنميش تهلكه لي برنامه لرين دقته آليبلار و ياخشي بيليرلر كي كورد تروریست لری ائله چاغداش ((معاصير)) تاريخده اولان كيمي يئنده آذربايجانين باتي بؤلگه سينده اوزلرين بير ساواشا و تالانا حاضيرلاييرلار اما بو دفعه هر شئي يالنيز بير ساواش يا تالان لا سونوج لانمير بلكه كورد تروریست لری بو دفعه آذربايجانين باتي بؤلگه سينه طاماح گؤزو سالييب و بو اراضي ني اله گئچيرمك له بوردا بير كورد دوولتي ياراتماق ايسته ييرلر.

كميته قوروجو هئيتي بو مساله لري دوشونرك و آذربايجانين بوتوولويونه داياناراق قورولوبدور و ايندي ايسه اورمو، قوشاچاي و سولدوز شهرلرينده قول ياراديب و بير نئچه شهرده ده يئني قوللاريميز يارانماقدادير.

بئي، چاغداش ((معاصير)) تاريخدن سؤز آچديز، ائله دوغروداندا آذربايجانين باتي بؤلگه سينده شيخ عبيدالله، سيميتقو و 57 انقلابيندان سونراكي كورد تروریست لرین جينايت لر و باسقين چيليق لارين دوشوننده بو گون كوردلرين گله جه يه اولان برنامه لرينين نه قدر تهلكه لي اولماسي بللي اولور، اما بو آرادا كوميته نين گؤروشو كوردلره گؤره ندير، هابئله سيزجه كوردلرين قارشيسيندا آذربايجان ميلتينين نه ايشلر گؤرمه يي لازيم دير؟

باخين! بيز كوردلرين هامي سيني بير تره زييه قويموروق، دوغال اولاراق كوردلرين بير قيسمي اؤز ميلي و كولتورل انساني حاقلارينين داليسيجاديلار كي بيز بو شخص لره سايقي لي داورانيريق و اؤز دوستلوغوموزو اونلارا بيلديريريك اما تاسوفله بئله بير شخص لر كوردلرين ايچينده ساي لاري او قدر آزدير كي آشيري كوردلر ايچينده هئچ گؤزه گلميرلر، داها دوغروسو دئمك اولار كوردلرين هئچ بير سياسال قروپلاري يا پارتي لري بير كيريزسيز ((بحران سيز)) سياستين داوامجي سي دئييل لر. كوردلر اؤز ايچريلرينده هر نه قدر چتين ليكلري اولسادا آنجاق آذربايجان تورپاقلاريندا بير كورد دوولتي ياراتماقا اينانيرلار و بو يولدا هئچ بير شئي دن اسيرگه ميرلر، بلكه ائله بونا گؤره ده پ ك ك و پژاك كيمي تروريستي قروپلار ياراديرلار و اويه لرينين ((عضو لارينين)) سايي گون به گون آرتير. كوردلر هئچ نه يي دوشونمدن، ساواشي، تالانچي ليغي، گوناهسيز اينسانلارين اؤلومون دوشونمدن هر نه جورلوقدان اؤز خيالي آرزولارينين و هئچ گئرچه يه ((واقعيته)) دايانمايان ايستكلرينين داليسيجاديلار.

بو آرادا بيز، آذربايجان ميلتي، دوغال اولاراق و پارلاق تاريخيميزدن الهام آلاراق بير ميلي گؤرو عنوانيندا كورد باسقين چيلاري و تروريست لري قارشيندا قانيميزين سون داملاسينا قدر دايانيب و مبارزه آپاراجاييق، البته بو مبارزه لر هله ليك بيليم سل ((علمي)) و امنيتي قونولار و ميلتيميزه كورد سورونو قونوسوندا دوشونجه و شعور وئرمك اولسادا، يئرينده و زامان سوره سينده كوردلرين نه شكيلده آرايا گلمه لرين دقته آليب و قاباقلارينا اؤز قانان ديللري كيمي چيخاجاييق.

بيز كوردلري مهاجر اقليت كيمي آذربايجان تورپاقلاريندا تانييريق و اونلارين اينساني و ميلي حاقلارينا سايقي لييق، اما او كوردلر كي آذربايجان اراضي سينه طاماح گؤزو ايله باخيرلار بيلمه ليديلر كي آذربايجان تورپاقلاريندا هر بير آتديمدا اونلارا قازيلميش بير مزار واردير.

چوخ ساغ اولون، بئي، دئديكلرينيزله من كي باتي آذربايجاندا ((غرب آذربايجاندا)) ياشييرام و كوردلرين يوروتدويو باسقين چيليق و تروريستي سياست لرين گورورم سيزين سؤزلريزه قاتيليرام و سيزين له فيكيرداشام، آنجاق ائله بو بؤلگه ده ((منطقه ده)) يا آذربايجانين باشقا شهرلرينده مثلا تبريز، اردبيل، زنگان، موغان، تهران و يا آوروپا و آمئريكادا ياشايان آذربايجانلي لار بيزيم كيمي كورد سورونونا باخميرلار، اونلارا گؤره كوميته نين باخيشي ندير؟

بيز بو قونونو گرك اونوتماياق كي بير نئچه اون ايلدن سونرا آذربايجاندا ميليت چيليك و ميللي دوشونجه لر و ميللي اويانيش پروسه سي باشلانيب و دوام ائدير. بو نئچه ايلده كي آذربايجان ميللي حركاتينين عومروندن گئچير، بيزيم ميلليت چيليغيميز چوخ كولتور ((فرهنگ)) ساحه سينده اولوبدور، آنا ديلي و ميللي كيمليك ان اساس دير وئرديغيميز قونولار اولوبلار، بو آرادا بيز كي تام بير مدني و انسان حاقلارين دوشونن بير ميللتيك تاسوفله طاماح كار قونشولاريميزين چيركين سياست لرين گؤزدن قاچيرميشيق، باتي آذربايجاندا كوردلرين كؤچمه سيني يا كوردلرين مافيايي قروپلار ياراديب و قاچاقچيليق ايله پول صاحابي اولمالاري و بوردا اؤزلرينه ملك آلمالاري و يا سئچگي لر چاغيندا كوردلرين يوروتدويو سياست لر و يوزلرجه باشقا چيركين سياست لري تاسوفله بيزي دوشوندورمويوب.

من او وطن داشلارا كي كوردو آذربايجاندا بير سورون ((معضل)) بيلميرلر دئييرم كي لوطفا بيزيم دئديكلريميز يوخ، بلكه ائله كوردلرين گؤتوردويو سياست لري و كوردلرين سياسال و تروريستي قروپلارينين حاضيرلاديقلاري بويوك كورديستان خريطه لرينه باخسينلار، بوگون كركوك دا تورك لرين كوردلر الي ايله قتل عام اولونماسينا باخسينلار، چاغداش ((معاصير)) قانلي تاريخيميزي اوخوسونلار و كوردلرين جينايت لرين يادا سالسينلار، هر بير شعورلو اينسانا بونو دوشونمك چوخ چتين دئييل كي اگر بيزده قاراباغ ميلتي كيمي يا كركوك لو سوي داشلاريميز كيمي توپراق و طاماح كار قونشولار قونوسوندا لاقيد ياناشساق تاريخين قارا صحيفه لري بيزه پاي اولاجاق دير.

بيز او فيكيرداشلاريميزا كي تبريزده، اردبيل ده، زنگاندا، تهراندا، آوروپادا يا آمئريكادا و يا باشقا يئرلرده ياشاييرلار و قاراباغ آزادليقينا هايقيريب و چاليشيرلار، دئييريك كي بوگون قاراباغ آزادليقينا ميتينگ قوروب شعار وئرمك چوخ چتين ايش دئييل، بوگون باتي آذربايجاندا كورد باسقين چيليقي و تروريسمي ايله قارشي-قارشييا و اوز-اوزه مقابله و مبارزه ائتمك بوتون آذربايجان ميلتينين غيرتين طلب ائدير. سايين فيكيرداشلار قاراباغين آزادليغي باتي آذربايجاندان گئچير.

ساغ اولون، بئي، قاراباغدان سؤز گئچدي، بيزيم نيسگيللي و مظلوم قاراباغيميزدان كي داشناك ائرمني لر طرفيندن اشغال اولونوب دور. بئي، نه اوخشار بير طالع دير، آذربايجانين قوزئيينده ده باتي بؤلگه ميز ((غرب منطقه ميز)) ائرمني لر طرفيندن اشغال اولونوب دور و بوگون آذربايجانين گونئيينده باتي بؤلگه سينده ((غرب منطقه سينده)) كؤتوح لري بيلينمه ين كوردلر طاماح گؤزو سالييب لار، سيز بو اوخشار دورومو نئجه دوشونورسونوز؟

چوخ اينجه و اؤنملي بير سورغودور، منجه قاراباغ مساله سي و اورانين اشغال اولونماسي يالنيز بير ساواش، سوي قيريمي ((نسل كشي)) يا اشغال چيليق دئييل، هابئله كوردلرين گونئي آذربايجاندا اولان تورپاق ادعالاري و چكديكلري خريطه كي اوندا ائرمنستان آدلي اؤلكه ايله قونشو اولورلار يالنيز كوردلرين اؤزلري ساريندان حاضيرلانماييب، بو آرادا بير نئچه بويوك دوولت اؤزليكله منطقه ده اولان بويوك آنتي تورك دوولت لر ائرمني لري، كوردلري و بوتون تورك دونياسينين دوشمانلارين دستك لييرلر.

آيدين بللي دير كي منطقه ده اولان بير نئچه دوولت ائرمنستان و كورديستان آدلاريندا اؤلكه لري يارتماق واسطه سيله تورك دونياسي آراسيندا بير ديوار ((حائل ديوار)) ياراتماق ايسته ييرلر. چونكي بوگون تورك لر كي چين دن بلغارا قدر 300 ميليونلوق نفوسا ماليك اولان ميللت ديلر كي اگر ميلي دوشونجه لري گوجلنيرسه تورك لر بويوك و چوخ گوجلو بير امپراطوريه چئوريليرلر. بو قونو بويوك و استعمارچي دوولت لرين ايسته يي دئييل و بير عاميل كي بو دوولت لر ائرمني لر يا كوردلردن حمايت ائديرلر تورك دونياسي آراسيندا بير حائل ديوار ياراتماق دير.

پس بوگون ائرمني يا كورد سورونو يالنيز آذربايجان ميلتينين يوخ، بلكه بوتون تورك دونياسينين سورونودور.

5-بئي، كوردلرين تروريستي قروپلاري پ ك ك و پژاك ايله ايلگيلي بير سورغو سورماق ايسته ييرم.

بئي، كوردلرين بو ايكي تروريستي قروپلارينين ليدرلري، اؤز آماج لاريني ((آزادليق)) و ((دموكراسي)) بيان ائديرلر، بو آرادا كوردلر آذربايجان ميلتيني دئييل بلكه ايران اسلامي رژيميني اؤزلرينه دوشمان تانيتديريرلار. كوميته نين بو قونويا و ائله بو تروريستي كورد قروپلارينا باخيشي ندير؟

هر شئي دن اؤنجه بو قروپلارين تروريست اولمالارينا تاكيد ائديريك، نئجه كي ((القاعده)) دين و مذهب بهانه سي ايله تروريستي ايشلر گؤرور ائله پ ك ك و پژاك دا ((دموكراسي)) بهانه سي ايله كورد باسقين چيليقينا داياناراق تروريستي ايشلر گؤرور. آرتيرمالييام كي بو قروپلارين آدي دونيانين تروريستي قروپلاري ايچينده واردير.

بيز اينسان حاقلاري، باريش و دموكراسي يه تاكيد ائدرك اؤز نفرتيميزي بوتون تروريستي قروپلارا بيلديريريك و كورد تروريست لرينه دئييريك كي اوزامانا دك كي اللرينده سلاح واردير دموكراسي و آزادليق يا كورد حاقلاريندان دانيشماق يالنيز بير بهانه و ميلتللري و انسانلاري يالداتماق يعني عوام فريبي دير.

اما بو كي كورد تروريست لري آذربايجان ميللتين يوخ بلكه ايران حاكميتين اؤزلرينه دوشمان تانيتديريرلار، منجه بئله دئييل و ائله كوردلر آذربايجان ميلتيني اؤزلرينه دوشمان بيليرلر، نييه كي كوردلر فارسلارين كويرلري و تورپاقلارينا دئييل بلكه آذربايجان زنگين اراضي سينه طاماح گؤزو ساللييب لار، بو تروريست لرين بوتون ائتديي جينايت لر آذربايجان تورپاقلاريندا اولوبدور نه فارسيستاندا، بوتون گوناهسيز اينسانلار كي بوردا اؤلدورولوب و قتل عام اولوبلار ائله تورك و آذربايجانلي ايميشلار حتي ايران رژيمينين خدمتينده اولان عسگرلر كي كورد تروريست لرله دؤيوشده شهيد اولوبلار يوزه 90 فاييزي تورك و آذربايجانلي ديلار. هابئله كورد تروريست لري باتي آذربايجاندان سونرا استانبول، آنكارا، ازمير، آنتاليا، كركوك، اربيل، تل عفير بولگه لرينده كي تورك يوردودولار تروريستي عمليات لار گئچيريرلر.

بوتون بونلاري دقته آلاراق، كوميته بئله دوشونور كي ائله بوگون فارس شووينيسمي بو تروريست كوردلري يوكسك سوويه ده دسته كله يير و بوگون كوردلر آذربايجانلي لار قارشيندا فارسلارين اوجوز عسگرلري ((سربازلاري)) سايليرلار.

اؤنجه سيزين سورغونوزو اصلاح ائتمك گركير، بو آنلامدا كي كركوك مساله سي يالنيز آذربايجان ميلتيني يوخ بلكه بوتون تورك دونياسيني ايلگيلنديرير.

21 جي عصرين بو گونكو ايللرينده دوروموموز بير حالا گليب چاتيب دير كي كركوك آذربايجان و تورك دونياسينين ((ديرنيش))، ((آزادليق)) و ياخود ((يئنيلمك)) قاپيسي ساييلير.

بيليرسينيز كي بغدادين 250 كيلومترليگينده اولان كركوك شهري كي ايللر بويو تورك لرين يوردو-يوواسي اولموش بويوك و زنگين نفت قايناقي دير. هر هانسي ميللت كركوكا و اونون سونسوز انرژي سينه ماليك اولا بيلرسه بير بويوك استراتژيك و اكونوميك گوجه مايك اولماقلا اوغورا و خوشبخت ليگه ساري يؤنله نير.

كوردلر بو منطقه ني اله گئچيرمك له نفت انرژي سينه ال تاپماقلا و آرديجا اقتصادي گوجلره يئتيشمك له بويوك كورديستان دوولتيني آذربايجان، توركييه، عيراق و سوريه تورپاقلاريندا ياراتماقي يوكسك سوويه ده دوام ائده جكلر.

اونلار بوگون كركوكدا توركلري قتل عام ائتمك له مين لرجه كورد عائيله سيني كركوكا كؤچدورمك له يالنيز كركوك تورك لري يوخ بلكه آذربايجان ميللتيني و ائله بوتون تورك دونياسيني بويوك تهلكه يه ساليرلار.

بيز بئله دوشونوروك كي كركوك آذربايجاندا اولان كورد سورونو قونوسوندا اولان چوخ اؤنملي و تعيين لشديرن اؤن سنگردير. اگر تاريخ بويو آذربايجان قوزئييده دربند يا هامان داريول دوشمانلاريميز قارشيسيندا بيزيم دمير قاپيميز اولوبدور ائله بوگون گونئي ده ده كركوك توركلرين دمير قاپي سي اولمالي دير.